Bjarni Hannesson ráðgjafi tekur sýni úr 13. braut.

Tekin voru jarðvegssýni úr brautum, flötum og teigum í lok mars og þau send til greiningar í Bandaríkjunum. Niðurstöður sýndu umtalsverðan skort á köfnunarefni (N), sem er aðalnæringarefni, en einnig á snefilefnum eins og brennisteini (S). Tekið var mið af þessu við val á áburði og ákvörðun um næringarmagn. Gjöf á brautum virðist lofa góðu en mikilvægt er að hún verði nákvæmari framvegis og markmið vel skilgreind.

Á komandi vertíð verður áhersla áfram á almenn grasgæði, nú aðallega á flötum, en átaks er augljóslega þörf á rúmlega helmingi þeirra. Á brautum verður áhersla á jafnari dreifingu næringar og á teigum verður fyllt oftar og meira í kylfuför.

Áformað er að reisa tvær áningarstöðvar með snyrtingu, ásamt fyrrnefndum hleðslustöðvum fyrir róbota. Staðsetningu þarf að ákveða með hliðsjón af notagildi fyrir kylfinga sem og sláttuvéla, en líklegt er að annað húsið verði við stíg milli flata á 3. og 14. braut og hitt við 8. og 12. teig. Kylfingar eiga tvisvar erindi á hvorn stað á 18-holu hring.

Þannig verða mest fjórar holur milli húsanna, að golfskálanum meðtöldum, sem gæti orðið aðgengilegri í hálfleik ef 9-holu lykkjum vallarins er víxlað. Til greina kemur að safna hraungrýti af svæðinu kringum 11. braut og fleirum, sem er óvinsælt og getur skapað hættu, og nýta það í hönnun húsanna. Meðfylgjandi myndir sýna aðeins dæmi um útlit, en þær eru gerðar með aðstoð gervigreindar.

4-5 manna starfslið mun hefja störf á ólíkum tíma á tímabilinu febrúar-apríl að báðum mánuðum meðtöldum. Umhverfi og innra byrði áhaldahúss verður endurskipulagt, hreinsunarátak gert og reglur settar um umgengni við svæðið, húsin og tæki framvegis. Hreinsistöð fyrir golfkerrur og skó verður komið fyrir við uppgöngu á vegarklæðingu bílastæðis.

Áhersla verður á almenn grasgæði, nú aðallega á flötum, en átaks er augljóslega þörf á rúmlega helmingi þeirra. Á brautum verður áhersla á jafnari dreifingu næringar og á teigum verður fyllt oftar og meira í kylfuför.

Stefnt er að því að kalla fram sterka og jákvæða breytingu í almennu yfirbragði vallarins með betri kantaslætti, m.a. kringum teiga og hvernig grasi vaxnar gönguleiðir og malarstígar mæta teigkrögum. Einhverjar hjáleiðir verða slegnar eða merktar með öðrum hætti á meðan skemmdir á grasi vöxnum gönguleiðum eru lagaðar.

Hugmyndir eru uppi um smíði á skápum fyrir sorp- eða flokkunartunnur, sem og á hirslum við teiga, fyrir flöskur með sand- og fræblöndu, sem kylfingar geta sjálfir notað til að fylla í kylfuför. Hugsanlega verða gerðar tilraunir til að smíða a.m.k. hluta af þessu, auk þrepa og ýmissa lausna á rofnum gönguleiðum upp brekkur, úr endurnýtta landgræðslutimbrinu.