Golfklúbbur Þorlákshafnar er íþróttafélag í Sveitarfélaginu Ölfusi og rekur m.a. Þorláksvöll, glæsilegan, fjölbreyttan og skemmtilegan 18-holu strandvöll hálftíma frá borginni. Fljótspilaður og léttur á fótinn. Golfbílar í boði stærstan hluta ársins. Vinalegt starfsfólk til þjónustu reiðubúið í notalegum skála frá morgni til kvölds.
Hikið ekki við að hafa samband á info@thorgolf.is.
Rauða liðið, undir forystu klúbbmeistarans Brynjars Loga Bjarnþórssonar, fagnaði sigri í Bændaglímunni í dag laugardaginn 12. september, en liðið fékk 22 stig gegn 14 stigum bláa liðsins, sem hinn klúbbmeistarinn, Berglind Ósk Geirsdóttir, fór fyrir.
Í rauða liðinu voru, frá vinstri á mynd: Pétur Sævald Hilmarsson, Guðmundur Kristján Haraldsson, Alex Þór Geirsson, Brynjar, Gunnar Freyr Þorsteinsson, Gunnar Þorsteinsson, Heiðrún Hreiðarsdóttir, Sigríður Karlsdóttir, Eva Hildur Kristjánsdóttir og Ásta Kristjana Jensdóttir.
Aðrir í rauða liðinu voru Uthman Jordan Adeyemo, Erla Adolfsdóttir, Húnbogi Jóhannsson, Jóhann Peter Andersen, Guðmundur Orri Arnarson, Hákon Davíð Nielsen, Gísli Borgþór Bogason, Guðjón Ingi Daðason, Adam Freyr Gunnarsson, Júlíus Steinn Kristjánsson og Gústaf Ingvi Tryggvason.
Í liði blárra og marðra, sem var synjað um nafnleynd, voru, auk Berglindar: Árni Hrannar Arngrímsson, Ívar Örn Baldursson, Baptiste Gateau, Andrés Ævar Grétarsson, Haraldur Guðmundsson, Hólmar Víðir Gunnarsson, Helgi Jökull Hilmarsson, Þórunn Jónsdóttir, Kristófer Júlíusson, Jóna Svava Karlsdóttir, Almar Kárason, Tómas Þór Kárason, Viktor Freyr Ómarsson, Heimir Óskarsson, Eyþór Almar Sigurðsson, Hörður Skúlason, Guðlaugur Þ. Sveinsson, Ásgeir Þorláksson og Þröstur Ægir Þorsteinsson.
Metfjöldi keppenda tók þátt, en 41 kylfingur skráði sig til leiks. Metþátttaka var einnig í fyrra, þegar 37 kylfingar glímdu. Bændaglíman er jafnan síðasta innanfélagsmót hverrar vertíðar, en í suðlægum strandbæ eins og Þorlákshöfn er sumar í september og enginn haustbragur á starfsemi GÞ.
Meðal næstu viðburða eru óopinbert Landsmót vinnustaða fimmtudaginn 24. september, þar sem sigurliðið fer á HM í Peking, og Þorláksmessumótið, sem haldið var í fyrsta sinn í fyrra og sló rækilega í gegn.
Rástímabókun á Þorláksvelli verður skipt upp í tvær 9-holu lykkjur á virkum dögum frá 7. september nk.
Þetta er gert í tilraunaskyni og er ásetningurinn að fjölga rástímum síðdegis og snemma kvölds á virkum dögum nú er kvöldbirta varir skemur.
Um helgar verður áfram hægt að bóka 18 holur.
Þegar rástími er bókaður þarf kylfingur að gæta þess að velja rétt aðfang. Þau eru:
Þorláksvöllur 18 holur - helgar
Þorláksvöllur fyrri níu - virkir dagar
Þorláksvöllur seinni níu - virkir dagar
Ef leiknar eru 18 holur á virkum degi þarf kylfingur að bóka tvo 9-holu rástíma. Seinni rástíminn þarf að taka mið af hóflegri tímaáætlun.
Athygli er vakin á möguleikanum að bóka seinni níu á undan og hefja leik á 10. teig til að eiga leið hjá skálanum eftir níu holur, þ.e. á leið frá 18. flöt og yfir á 1. teig.
Hápunktur golfsumarsins er enn eftir. Golfklúbbur Þorlákshafnar hefur opnað skráningu í nýja Íslandskeppni WCGC Iceland, sem fer fram á Þorláksvelli fimmtudaginn 17. september.
Fyrirtæki senda tveggja manna lið sem leika betri bolta í punktakeppni með forgjöf. Ekki þarf að ákveða leikmenn strax. Fyrirtæki geta tryggt sér eitt eða fleiri sæti núna og sent nöfn leikmanna síðar.
Sigurliðið verður fulltrúi fyrirtækis síns og Íslands í heimsúrslitum World Corporate Golf Challenge í Peking 19.–23. október. Kostnaður beggja leikmanna við ferðina og þátttöku í heimsúrslitunum er innifalinn í verðlaununum.
Æfingahringur, æfingaboltar, matur, drykkur og veitingar úti á velli eru meðal þess sem fylgir þátttökugjaldinu. Ef eftirspurn gefur tilefni til getur keppnin stækkað í tvær undankeppnir og sérstök landsúrslit, án viðbótarkostnaðar.
WCGC hefur verið haldið frá árinu 1993 og tengir saman fyrirtæki og kylfinga í meira en 30 löndum.
Bændaglímu GÞ 2026 hefur verið flýtt og mun hún fara fram laugardaginn 12. september nk. Að þessu sinni verður hún ögn beiskari en áður, þar sem brugðið verður á leik með svonefndri Hefnd vallarstjórans á nokkrum holum. Um er að ræða óhefðbundna og vægast sagt umdeilda uppsetningu ákveðinna brauta, að erlendri fyrirmynd sem hefur verið kölluð Greenkeeper's Revenge. Sjón er sögu ríkari.
Vegna mikillar eftirspurnar eftir vinsælli haustaðild síðasta árs bjóðum við hana aftur í ár.
Fáðu ótakmarkað golf á Þorláksvelli út árið fyrir aðeins 19.900 kr. Haustið er frábær tími til að njóta vallarins, hvort sem þú ætlar að ná nokkrum aukahringjum, bæta leikinn eða einfaldlega njóta góðra daga á vellinum. Já eða kynnast okkur betur?
Gefnar hafa verið út holustaðsetningar fyrir þriðju og síðustu umferð Íslandsmóts í höggleik 14 ára og yngri á Þorláksvelli laugardaginn 22. ágúst 2026.
Rástímar hafa verið gefnir út fyrir lokaumferð Íslandsmóts í höggleik 14 ára og yngri á Þorláksvelli laugardaginn 22. ágúst. Til að bregðast við veðurspá hefur ræsingu verið flýtt til kl. 7 og kylfingum í hverjum ráshópi fjölgað í fjóra.
Gefnar hafa verið út holustaðsetningar fyrir 2. umferð Íslandsmóts í höggleik 14 ára og yngri á Þorláksvelli föstudaginn 21. ágúst 2026.
Íslandsmót í höggleik 14 ára og yngri hefst á Þorláksvelli á morgun, fimmtudaginn 20. ágúst og eru 98 keppendur skráðir til leiks í tveimur aldursflokkum stúlkna og drengja, 13-14 ára og 12 ára og yngri.
Mótið stendur yfir fram á laugardag og leika eldri kylfingarnir 18 holur á dag, alls 54, en þeir yngri 9 holur á dag, eða 27 holur alls.
Meðfylgjandi eru holustaðsetningar í 1. umferð.
Keppni er hafin í 4. deild karla á Íslandsmóti golfklúbba, en leikið er á Miðdalsvelli Golfklúbbs Dalbúa í grennd við Laugarvatn. Liðið skipa Brynjar Logi Bjarnþórsson klúbbmeistari, Dagur Skúlason sem jafnframt er liðsstjóri, Guðmundur Kristján Haraldsson, Gunnar Friðrik Gunnarsson, Hörður Skúlason og Þröstur Ægir Þorsteinsson.
Keppni er hafin í 2. deild kvenna á Íslandsmóti golfklúbba, en leikið er á Silfurnesvelli Golfklúbbs Hornafjarðar. Liðið skipa Berglind Ósk Geirsdóttir klúbbmeistari, Birna Daðadóttir Birnir, Svava Agnarsdóttir, Una Guðjónsdóttir og Þórunn Jónsdóttir.
Opna Hamingjumótið fór fram á Þorláksvelli sl. sunnudag, í samstarfi við 66 Norður, en mótið er liður í bæjarhátíðinni Hamingjan við hafið. Leikið var með Texas Scramble-fyrirkomulagi með tveimur í hverju liði og luku alls 96 lið keppni, eða 192 kylfingar.
Baráttan um efstu sætin var hnífjöfn og léku öll þrjú efstu liðin á 61 höggi nettó. Eftir að hafa beitt almennum reiknireglum röðuðust þau þannig upp:
sæti; Emilsson/Ásgeirsson; Emil Þór Ásgeirsson og Emil Ásgeir Emilsson.
sæti; Gúbbarnir; Sigurður Steinar Ásgeirsson og Hafsteinn Ísarr Sigurðsson.
sæti; Bogey Gang; Gísli Steinar Valmundsson og Þorvaldur Freyr Traustason.
Sigurvegarar fá hvor um sig vestið Vatnajökul frá 66 Norður, að andvirði 36 þúsund króna. Fyrir annað sæti fæst Grettispeysa frá 66 Norður að verðmæti 17.900 kr. og fyrir þriðja sæti pólóbolur á 16.900 kr.
Þessi hlutu nándarverðlaun (hola, nafn, sentimetrar frá holu eftir upphafshögg):
2. Hrefna Sigurðardóttir 148
5. Guðmundur Kristján Haraldsson 305
10. Steingerður Hreinsdóttir 82
12. Maron Björgvinsson 46
15. Lárus Guðmundsson 44
Öll fá kerrulúffur og húfu frá 66 Norður.
Vitja má verðlauna í afgreiðslu Þorláksvallar milli kl. 8 og 21.
Sveitakeppni LEK 75+ fer fram á Þorláksvelli mánudag og þriðjudag 10.-11. ágúst. Hægt er að fylgjast með gangi mála með því að smella á hnappinn.
Gefnar hafa verið út holustaðsetningar fyrir 2. umferð Meistaramóts GÞ, föstudaginn 17. júlí.
Metfjöldi tekur þátt í Meistaramóti GÞ, sem hófst í dag fimmtudaginn 16. júlí. 77 kylfingar mættu til leiks í fyrstu umferð í dag, tíu fleiri en í fyrra, en allir flokkar leika þrjár umferðir, eina á dag í þrjá daga.
Mótinu lýkur á laugardag, en þá verður ræst út samtímis á öllum teigum kl. 13. Verðlaun verða afhent á lokahófi á laugardagskvöld.
Veðurguðirnir voru ögn blíðlegri við keppendur en þeir hafa verið síðustu daga og eru veðurhorfur ágætar.
Útlit er fyrir jafna og spennandi keppni í nær öllum flokkum og stefnir því í mikla hátíð GÞ-félaga næstu daga. Smellið á hnappinn hér að neðan til að skoða stöðu, jafnt milli hringja sem og á meðan leik stendur.
Gleðilegt Meistaramót 2026! Hér eru holustaðsetningar dagsins. Gangi ykkur sem allra best og njótið þessarar hátíðar okkar.
Vissir þú að samkvæmt upphaflegri hönnun átti almennt að leika 2. holu Þorláksvallar af gömlum teigum uppi í kambinum, sem tilheyrðu brautum sem nú hafa verið lagðar af vegna sandfoks?
Útsýnið þaðan er sannarlega glæsilegt og nú styttist í að kylfingar fái þess notið á nýjan leik, því vinna er hafin við endurgerð stíga þangað upp.
Nýting þessara teiga er jafnframt liður í að taka neðri útgáfu brautarinnar, og þannig gönguleiðina milli tjarnanna, úr leik tímabundið, svo ráðast megi í holufyllingar og allsherjar endurræktun hennar án þess að nýrækt verði fyrir stöðugum ágangi.
Á næstu dögum verður sett upp salernisaðstaða til bráðabirgða, milli 11. flatar og gula teigsins á holum 8 og 12, meðan unnið er að fullnaðarhönnun, leyfisumsóknum og smíði varanlegra þjónustuhúsa. Undirbúningur hófst strax að loknum síðasta aðalfundi, þar sem kynntar voru niðurstöður viðhorfskönnunar meðal félaga, en þar voru vallarsalerni oftast sögð mest aðkallandi.
Í og við varanlegu húsin, sem verða á allt að fjórum stöðum á vellinum, er m.a. gert ráð fyrir salernisaðstöðu fyrir kylfinga, hleðslustöðvum fyrir sjálfvirkar sláttuvélar með sólþiljum á þaki og áfyllingaraðstöðu ásamt lendingar- og flugtakspalli fyrir áburðardróna.
Áhersla hefur verið lögð á vandaða hönnun með tilliti til síbreytilegs rekstrarumhverfis golfvalla og ólíkra sviðsmynda hvað varðar þróun vallarsvæðisins til framtíðar, þ.á.m. möguleika á breyttri leikröð brauta með hugsanlegum nýjum golfskála.
Meðfylgjandi hönnunartillögur voru unnar af Atla Jóhanni Guðbjörnssyni hjá TAG teiknistofu, í góðri samvinnu við Þorstein Gunnarsson hjá Byggingafélaginu Fögruborg, sem lagt hefur GÞ lið á ýmsa lund í undirbúningi þessa verkefnis, sem GÞ er þakklátur fyrir.
Sprenging hefur orðið í golfiðkun barna og unglinga í Þorlákshöfn, en um 20% allra barna á skólaaldri æfa nú hjá Golfklúbbi Þorlákshafnar. Nákvæmur fjöldi iðkenda er 58, en alls eru 292 nemendur skráðir í Grunnskólann í Þorlákshöfn og er hlutfallið því 19,86%.
Til að mæta þessari auknu eftirspurn hefur GÞ bætt við leiðbeinendum, aukið viðveru hvers þeirra og fjölgað æfingatímum svo skipta megi hópnum upp og þannig sinna hverjum einstaklingi betur.
Þessi þróun undirstrikar þörf fyrir stærra og betra æfingasvæði, barnateiga, geymslu fyrir golfbúnað barna og betri samgöngur milli þéttbýlis og golfvallar, t.d. með öruggum göngu- og hjólastíg.
Dregið hefur verið í 2. umferð Bikarkeppni GÞ, sem er holukeppni með forgjöf. Þrátt fyrir tap í bráðabana fyrir Jóni Hafsteini kemst Sindri Freyr áfram, þar sem hann fór lengst með sinn leik af öllum þeim sem þurftu að játa sig sigraða í 1. umferð. Keppendur hafa til og með 1. júlí til að ljúka leikjum sínum í 2. umferð.
Fimmtudagskvöldið 18. júní, kl. 19, kemur hinn heimsþekkti Random Golf Club í heimsókn á Þorláksvöll. Við ætlum að hóa saman eins mörgum og við getum í svokallað Mad Scramble, þar sem allir leika saman í ráshóp og liði með Texas Scramble-fyrirkomulagi.
Algengt er að 50-150 manns leiki saman. Markmið okkar er að ná hundrað manns.
Þetta snýst aðeins að litlu leyti um golfið, heldur um að koma saman, vinir og ókunnugir, og njóta lífsins saman gegnum golfleikinn. Tónlist, veitingar, teiggjafir á íslensku sumarkvöldi.
Ekki missa af ógleymanlegri kvöldstund með fullt af ókunnugu fólki sem allt hefur eitt og sama markmiðið, að slá met í skemmtun.
Á morgun, miðvikudaginn 10. júní, verður lóðskorið í flatirnar, en lóðskurður (e. verticutting) er viðhaldsaðgerð þar sem skorið er í flötina lóðrétt með sérstökum hnífum, m.a. til að draga úr hliðarvexti, einkum illgresis, stuðla að uppréttari vexti svo sláttur beri meiri árangur og auki álag á illgresið í samkeppni við æskilegri grös.
Þessi aðgerð er sú fyrsta í ákveðinni átakslotu næstu daga, þar sem lóðskurðinum verður fylgt eftir með yfirsáningu, söndun og næringargjöf með kornaáburði skv. áætlun frá Bjarna Hannessyni ráðgjafa.
Óhjákvæmilega verða kylfingar fyrir ónæði á meðan unnið er, en tilgangur aðgerðanna er að stuðla að meiri gæðum til lengri tíma, enda bendi auknar líkur á viðunandi loft- og jarðvegshita til þess.
Kylfingum eru færðar fyrirfram þakkir fyrir þolinmæði, skilning og tillitssemi í garð vallarstarfsfólks.
Eva Kristinsdóttir úr Golfklúbbi Mosfellsbæjar sigraði á POWERADE-mótinu, sem lauk á Þorláksvelli í dag, sunnudag, en mótið var liður í GSÍ-mótaröðinni. Eva stakk af í byrjun lokahringsins, þegar hún fékk fimm fugla á fyrstu sjö holunum. Eva lauk leik á sex höggum undir pari eftir þrjá hringi, fimm höggum á undan Andreu Ýr Ásmundsdóttur frá Akureyri, sem varð önnur.
Elsa Maren Steinarsdóttir GL og Karen Lind Stefánsdóttir GKG deildu þriðja sætinu, en leika þurfti á pari eða betur til að komast á pall.
Aron Snær Júlíusson úr GKG vann þriðja sigur sinn í röð á GSÍ-mótaröðinni er hann varð hlutskarpastur á POWERADE-mótinu á Þorláksvelli í dag, sunnudag. Í þetta sinn sigraði hann eftir að hafa sýnt eina bestu frammistöðu sem sést hefur á seinni níu holum vallarins. Þær lék Aron Snær á 30 höggum, sex undir pari, og kláraði hann hringinn með erni á 17. holu og fugli á þeirri átjándu. Skaust hann þannig framúr þeim Hákoni Erni Magnússyni og Böðvari Braga Pálssyni, sem báðir koma frá Golfklúbbi Reykjavíkur. Aron lauk leik á sextán höggum undir pari, en hinir tveir á fjórtán undir.
Aron Snær og Böðvar Bragi voru jafnir þegar aðeins átjánda holan var eftir, en Böðvari fataðist flugið og fékk hann skolla á meðan Aron fékk fagnaði fugli og sigri um leið. Sigurganga hans heldur því enn áfram á mótaröðinni og er hún saga til næsta bæjar.
Gefnar hafa verið út holustaðsetningar fyrir lokahring Powerade-mótsins á morgun, sunnudag.
Æfingasvæðið er lokað nú í kvöld, laugardagskvöldið 6. júní, vegna boltatínslu fyrir lokahring Powerade-mótsins á GSÍ-mótaröðinni á morgun.
Fimm glæsilegir fulltrúar GÞ af yngstu kynslóðinni stóðu sig með mikilli prýði í Golf14-móti hjá Nesklúbbnum um helgina.
Ágústa Ósk Ásgeirsdóttir keppti í flokki 13-14 ára stúlkna, en í honum voru leiknar 27 holur, en Ágústa varð tólfta á 152 höggum.
Gunnar Erlingur Hákonarson lék átján holur á 100 höggum og varð ellefti í flokki drengja 10 ára og yngri.
Í flokki drengja 13-14 ára voru leiknar 27 holur og kepptu þessir þrír GÞ-félagar í honum:
Hafsteinn Ísarr Steinarsson, 128 högg, 27. sæti.
Björgvin Breki Sindrason, 147 högg, 41. sæti.
Ernir Ingi Eiríksson, 156 högg, 42. sæti.
Ljóst er að öll eiga þau framtíðina fyrir sér á golfvellinum ef þau halda áfram á sömu braut og er Golfklúbbur Þorlákshafnar stoltur af þessum ungu fulltrúum.
Gunnar Erlingur Hákonarson í 10 ára og yngri.
Kepptu allir í flokki drengja 13-14 ára.
Keppti í flokki stúlkna 13-14 ára.
Hallgrímur Þór Axelsson sigraði í annarri umferð Innanfélagsmótaraðar GÞ, sem fór fram vikuna 18. til 22. maí, en með minnsta mögulega mun því hann og fjórir aðrir fengu 20 punkta á holunum níu sem leiknar voru.
Hinir voru Heimir Óskarsson, Dagur Skúlason, Hafsteinn Ísarr Sigurðsson og Elvar Már Ragnarsson. Hafsteinn vann fyrstu umferðina og er efstur á stigalista mótaraðarinnar eftir tvö mót.
Þriðja umferð fer fram vikuna 1. til 5. júní.
Tímabil útiæfinga barna og unglinga hefst í dag. Smelltu á hnappinn hér að neðan til að skoða æfingatöflur.
Vinna við uppsetningu sólþilja hófst í dag, við hvíta teiginn á 4. braut, en þar mun stærstur hluti sjálfvirka Husqvarna-sláttuvélaflotans hlaða sig. Allt grassláttur á vellinum er nú rafknúinn og er langsstærstur hluti hans enn fremur sleginn á sólarorku.
Vart er hægt að hugsa sér hentugri orkugjafa fyrir grassslátt, þar sem gras vex vart nema birtu njóti við og er orkuöflunin því almennt í samræmi við sláttuþörfina.
Sólþiljurnar eru nú reistar á bráðabirgðaundirstöðum, en verða festar á þök salernishúsa þegar þau verða tilbúin, en áformað er að þau rísi á tveimur stöðum, annars vegar milli brauta 3, 4, 14 og 15 og hinsvegar milli 7, 8, 11 og 12. Þessar miðlægu staðsetningar hafa verið valdar með þarfir kylfinga og sláttar í huga.
Husqvarna-flotinn kemur frá MHG-verslun, en Rafgeymasalan er söluaðili sólþiljanna auk áriðla, stýringa, rafgeyma, hlífðarkassa, kapla o.fl. og er báðum þessum fyrirtækjum þakkað fyrir framúrskarandi þjónustu, ráðgjöf og eftirfylgni.
Heimamaðurinn Ásmundur Pétursson valdi sannarlega rétta tímann til að ná besta hring sínum á Þorláksvelli er hann vann glæsilegan sigur í punktakeppni Black Sand Open fyrr í dag, 1. maí.
Ásmundur, sem sigraði á Innanfélagsmótaröð GÞ í fyrrasumar, heldur uppteknum hætti, kemur funheitur undan vetri og fékk 44 punkta á hringnum. Yfirburðir Ásmundar voru nokkrir og var hann þremur punktum á undan næsta manni, þótt hann hefði leikið síðustu holuna á sjö höggum, tveimur höggum yfir pari. Snorri Jökull Egilsson varð annar með 41 punkt og Skúli Kristinn Skúlason þriðji á 40 punktum.
Fyrir sigurinn fékk Ásmundur kvöldverð, gistingu og dekur í heilsulind hins nýja og glæsilega Black Sand Hotel á Óseyrartanga við Ölfusárós. Við óskum Ásmundi innilega til hamingju með sigurinn og áfangann.
Golfsamband Íslands hefur þegið boð frá stjórn Golfklúbbs Þorlákshafnar um að taka við áður aflýstu móti á Unglingamótaröð GSÍ, sem vera átti og er nú aftur komið á dagskrá Hvítasunnuhelgina 23.-25. maí.
Í tilkynningu GSÍ segir m.a.:
"Með þessu tryggir GÞ að unglingar landsins fái tækifæri til að hefja keppnistímabil sitt sem fyrst, en mótaröðin er mikilvægur vettvangur fyrir okkar efnilegu kylfinga.
Golfsamband Íslands er þakklátt Golfklúbbi Þorlákshafnar fyrir að leysa þetta mikilvæga mál. Hér að neðan má sjá dagskrá Unglingamótaraðarinnar í sumar."
Um málið segir Árni Hrannar Arngrímsson, formaður GÞ:
“Við urðum fyrir miklum vonbrigðum við fréttir af aflýsingu unglingamótsins. Þetta var leiðinlegt fyrir unglingana, bæði að missa mótið sitt og líka að fá þessi skilaboð frá hreyfingunni,” segir Árni Hrannar Arngrímsson, formaður GÞ.
Árni segir ekki sjálfsagt að sömu klúbbarnir bæti stöðugt við sig verkefnum. “Ástandið batnar ekki þannig, en mikilvægast er að þetta bitni ekki á yngstu kylfingunum núna. Við erum með tvö önnur GSÍ-mót í ár og þetta reynir nokkuð á okkur. Gott samstarf okkar við GSÍ hefur gert gæfumuninn og við treystum líka á að aðstandendur, þjálfarar og fylgdarfólk leggist á árarnar með okkur svo að unglingarnir fái flott mót í stað þess að sitja heima.”
Golfklúbbur Þorlákshafnar býður upp á fatnað frá 66°Norður, sem merktur er klúbbnum. Hægt verður að koma og máta hanní Teignum golfstofu, Vesturbakka 1, bili 105, í Þorlákshöfn miðvikudaginn 15. apríl milli kl. 17-19.
Verð fyrir merktan fatnað eru þessi:
Grettir peysa 14.900 kr.
Pólóbolur 13.900 kr.
Vatnajökull vesti: 25.900 kr.
Straumnes buxur ómerktar: 15.900 kr.
Pöntun fer fram gegnum stafrænt bókunarform hér og er bindandi. Krafa er send í heimabanka og er greiðslufrestur til 1. maí 2026. Pantanir sem ekki eru greiddar innan frests verða ekki afgreiddar. Aðeins greiddar pantanir fara í framleiðslu.
Fatnaður er merktur og fæst því ekki skilað eða breytt eftir pöntun. Afhending er í golfskála eða með sendingu í Dropp gegn aukagjaldi.
Birkir Marínósson hafði aðeins leikið eina holu á árinu áður en hann fór holu í höggi á 2. braut Þorláksvallar fyrr í dag. Hann byrjar golfárið því aldeilis með glæsibrag, að leika fyrstu par-3-holu ársins á einu höggi.
“Þetta var fyrsti hringur "sumarsins" og ég hef aldrei farið holu í höggi áður. Það var mikill mót-hliðarvindur frá vinstri til hægri svo þetta var einstaklega ljúft,” sagði Birkir í samtali við fréttaveitu GÞ, en hann sá boltann aldrei fara ofan í. “Holan var á bakvið hólinn sem er þarna fyrir framan greenið. Það var svo ansi grunsamlegt að sjá ekki kúluna þegar við komum að greeninu. Einn meðspilari minn kíkti því ofan í og þar var hún!”
Við óskum Birki innilega til hamingju með draumahöggið og sannkallaða draumabyrjun á leiktíðinni.
Völlurinn er opinn, en er enn blautur eftir leysingar og er notkun golfbíla óheimil þar til annað verður tilkynnt. Bóka þarf rástíma áður en völlur er leikinn. Skálinn er lokaður vegna framkvæmda og er vallargjald greitt fyrirfram á netinu.
Björgunarsveitin Mannbjörg og Golfklúbbur Þorlákshafnar hafa tekið höndum saman, að frumkvæði Sveitarfélagsins Ölfuss, um lagningu gönguskíðabrauta á Þorláksvelli. Fyrstu sporin voru lögð í fyrradag, laugardag á páskum, og var það sjálfur formaður Mannbjargar, Magnús Páll Haraldsson, sem dró spora golfklúbbsins á fjórhjóli.
Í þessari fyrstu tilraun eru tveir mislangir gönguhringir. Gulur er 1,5 km og rauður 3 km. Þeir liggja um sömu spor á rauðgula kaflanum, en beygt er til vinstri til að fara lengri hringinn og hægri til að stytta sér leið. Gengið er réttsælis, eins og klukkan, og byrja báðir hringir við litla kofann á æfingasvæðinu. Þaðan er gengið beint af augum til vesturs, í átt að Þorlákshafnarvegi.
Verkefnið er í samstarfi Ölfuss við félögin tvö. Golfklúbburinn hannar brautirnar, leggur til sporann, fylgist með færi, óskar eftir aðkomu Mannbjargar og auglýsir er færi gefst, en Mannbjörg leggur til mannafla og búnað til að draga sporann eftir gps-gögnum frá GÞ.
Vonast er til að sem flestir geti nýtt sér sporin og fái þannig þessarar heilnæmu vetraríþróttar. Verkefnið er á byrjunarstigi og eru allar ábendingar og tillögur vel þegnar. Til skoðunar er m.a. að setja upp skilti, jafnvel varanleg, til að auðvelda fólki að rata, finna rétta byrjunarstaðinn o.s.frv.
Á myndinni fagnar Magnús Páll áfanganum með Edwin Roald, nýbökuðum gönguskíðabrautahönnuði GÞ.
Félagar í Golfklúbbi Þorlákshafnar geta leikið hinn ægifagra Silfurnesvöll á Höfn, hjá Golfklúbbi Hornafjarðar, fyrir aðeins 4.350 kr.
Silfurnesvöllur, sem hefur níu holur, er með myndrænustu golfvöllum landsins. Á fáum völlum kemst kylfingurinn í jafn nána snertingu við hafflötinn, sem er sums staðar í seilingarfjarlægð frá teigum og brautum.
Hafið kemur við sögu á öllum brautum nema einni, þ.á.m. á áttundu braut, par-3, þar sem slegið er út á eyju í sjó. Aðeins er vitað um eina aðra eyjuflöt á hafi úti, á Punta Mita í Mexíkó, en þar er umrædd hola aðeins leikin er sjávarhæð leyfir.
Á Silfurnesi kemur eyjan best fram er stórstreymt er, og þegar vel viðrar speglast skriðjöklarnir á haffletinum svo úr verður mikið sjónarspil.
Gert hefur verið vinavallasamkomulag sem veitir félögum í Golfklubbi Þorlakshafnar aðgang að golfvellinum á Siglufirði á sérkjörum. Á Sigló er glæsilegur 9-holu völlur í Hólsdal, innst í Siglufirði. Völlurinn, sem opnaði 2018, leiðir kylfinginn í ferðalag inn eftir mikilfenglegum fjallasal, eftir bökkum Leyningsár og Hólsár, fullum af bleikju, og þaðan inn um faldar perlur skógræktarinnar.
Völlurinn nær hápunkti á holum 5-8. Fimmta holan er stutt og breið par-4-hola sem liggur um óbreyttan túnakur frá 14. öld og fornar rústir, með óvæntum glaðningi bakvið flötina. Því næst koma tvær af glæsilegustu par-3-holum landsins. Hin fyrri er undir hundrað metrum frá öllum teigmerkjum, með langri og mjórri flöt innan um há furutré. Hin síðari birtist eftir göngu niður og í gegnum skóginn, áður en slegið er niður á stóra eyjuflöt í lygnu lóni í ármótunum.
Félagar í Golfklúbbi Þorlákshafnar geta leikið völlinn á Sigló á 5.000 kr. sumarið 2026.
Hafin er smíði flokkunarstöðva fyrir drykkjaumbúðir, pappa, plast og lífrænt, sem staðsett verða með reglulegu millibili á vellinum, eða á mest þriðju hverri holu til að byrja með. Þessar stöðvar munu leysa gömlu ruslaföturnar af hólmi og um leið fjölgar tækifærum fyrir kylfinga til að losa sig við umbúðir og lífrænar afurðir eins og ávaxtahýði.
Á sama hátt verður auðveldara að flokka úrgang sem frá starfsemi klúbbsins kemur, en það getur stuðlað að sparnaði, auknum tekjum og síður neikvæðum umhverfisáhrifum. Skáparnir eða gerðin munu standa úti allt árið, enda rástímar bókaðir í öllum mánuðum ársins. Þau verða klædd með lerki og er gert ráð fyrir að það fái að veðrast.
Félagar í Golfklúbbi Þorlákshafnar geta leikið Katlavöll á Húsavík á sérkjörum, en gert hefur verið vinavallasamkomulag við Golfklúbb Húsavíkur þess efnis.
Katlavöllur er meðal allra bestu golfvalla á Norðurlandi og hefur tekið stakkaskiptum með uppbyggingu glæsilegs golfskála á fallegum og skjólsælum útsýnisstað.
Félagar í GÞ geta nú leikið völlinn eins oft og þeir vilja sama daginn fyrir aðeins 5.250 kr. ef bókað er beint gegnum Golfbox.
Gert hefur verið vinavallasamkomulag við Golfklúbbinn Leyni á Akranesi, en völlur klúbbsins, Garðavöllur, nýtur æ meiri vinsælda, enda umsjón hans til fyrirmyndar sem og aðstaðan í nýlegu, glæsilegu klúbbhúsi.
Félagar í Golfklúbbi Þorlákshafnar geta leikið þennan 18-holu völl fyrir 5.500 kr. ef bókað er beint gegnum Golfbox, óháð degi vikunnar og tíma dags.
Golfvöllurinn í mynni Herjólfsdals í Vestmannaeyjum er óviðjafnanlegur og margrómaður fyrir einstakt umhverfi. Þó þær liggi að mestu fjær ströndinni en seinni níu holurnar, þá liggja sumar af fyrri níu holunum um eitt áhugaverðasta golfsvæði landsins og er fjórða holan, sem er par-5, líklega eitt besta dæmið þar um. Holur 6-8 er enn fremur elstu golfholur landsins sem enn eru í notkun, en þær voru skipulagðar eða lagðar 1938-1939.
Fyrir flesta er hápunktur vallarins líklega á holum 15-17, sem liggja meðfram vogskorinni klettaströndinni, þar sem kylfingar hafa tvisvar val um hve djarft þeir tefla í höggum sínum yfir víkur og kverkar.
Félagar í Golfklúbbi Þorlákshafnar geta leikið völlinn fyrir 5.500 kr. er bókað er beint gegnum Golfbox.
Félagar í GÞ munu fá sérkjör á Jaðarsvelli hjá Golfklúbbi Akureyrar í sumar. Jaðarsvöllur er einn glæsilegasti golfvöllur landsins, fjölbreyttur, hæðóttur, skógi vaxinn og með breiðum brautum. Vallargjald til GÞ-félaga er 7.000 kr.
Hlíðavöllur við Leirvog og Bakkakot í Mosfellsdal, sem starfræktir eru af Golfklúbbi Mosfellsbæjar, eru meðal vinavalla á nýjum lista GÞ.
Hlíðavöllur er 18-holu keppnisvöllur við Leirvog í Mosfellsbæ. Völlurinn liggur við ströndina og er óviðjafnanlegt útsýni bæði til sjávar og fjalla. Völlurinn er fjölbreyttur og skemmtilegur með mörgum áskorunum. Eldri hlutinn er tiltölulega stuttur og eru nokkrar flatir þar aðeins upphækkaðar. Á nýrri hluta vallarins eru brautirnar talsvert lengri og flatir almennt mjög stórar.
Bakkakot er 9-holu völlur í Mosfellsdal. Einkenni eru stuttar brautir og trjágróður, en í gegnum árin hefur mikið verið gróðursett á svæðinu og er staðurinn sannkölluð sveitasæla stutt frá ys og þys borgarinnar. Ekki er þó endilega auðvelt að skora völlinn vel, þó hann sé stuttur. Beita þarf mismunandi höggum og skipta staðsetningar miklu máli til að ná góðu skori. Flatir teljast í minni kantinum og því þarf nákvæm högg til að koma sér í fuglafæri.
Kylfingar sem ekki eru skráðir í golfklúbb innan vébanda Golfsambands Íslands geta nú fagnað, því Golfklúbbur Þorlákshafnar býður nú í fyrsta sinn sérstaka fjaraðild út árið á aðeins 9.900 kr.
Innifalin er forgjöf viðurkennd af GSÍ, þátttökuréttur í opnum mótum, rástímabókun á rúmlega 60 völlum og einn hringur á Þorláksvelli. Fjárhæðin getur gengið upp í aðra aðild á árinu.
Vinavellir GÞ eru ekki innifaldir og aðildin gefur hvorki atkvæðis- né framboðsrétt á aðalfundi.
Samið hefur verið við Chris Elrick um aðkomu að vallarumsjón, sjálfvirknivæðingu, tækjaviðhaldi, framkvæmdum o.fl. Með samningnum tryggir GÞ sér ákveðinn hluta af vinnustundum og forgang að nýrri þjónustu Chris, undir merkjum Omnikai.
“Þetta er rökrétt næsta skref, til að gera Þorláksvöll eins góðan og hann getur orðið. Chris hefur metnað, er fjölhæfur og þaulreyndur. Við erum mjög ánægð með samkomulagið,” sagði Edwin Roald vallarstjóri.
Chris ólst upp í grennd við og vann lengi á Royal Aberdeen, einum hæst skrifaða golfvelli Bretlandseyja, áður en hann kom til Íslands 2017, fyrst til að vinna hjá Golfklúbbnum Keili og síðar sem vallarstjóri í Brautarholti.
“Þorláksvelli svipar til margra strandvalla í heimalandi mínu og íslensk náttúra styrkir hann enn frekar. Markmiðið er að ná því besta úr þessum efnivið, með klúbbnum og Edwin,” sagði Chris Elrick.
Mótanefnd GÞ auglýsir eftir klúbbfélögum sem hafa áhuga á að sækja héraðsdómaranámskeið GSÍ, sem hefjast þriðjudaginn 17. febrúar nk.
Þátttaka kostar ekkert og hægt er að horfa á netfyrirlestra þegar hentar. Bein útsending er í fjórum lotum, þ.e. 17., 19., 23. og 25. febrúar. Sýningartími er 19:30 til 22:00.
Mótanefnd Golfklúbbs Þorlákshafnar mun horfa saman á fyrirlestrana í golfskálanum. Þeir sem vilja láta vita af sér og taka þátt í hópáhorfi mótanefndar geta sent tölvupóst til Ingvars Jónssonar, formanns mótanefndar, á netfangið ingvar@thorgolf.is.
Taka má þátt án prófs, en héraðsdómararéttindi fást aðeins með því að standast það.
Hægt er að lesa meira hér og skrá sig hjá GSÍ með því að smella á hlekkinn hér að neðan eða með því að senda tölvupóst á netfangið domaranefnd@golf.is.
Golfklúbbur Þorlákshafnar og Teigurinn Golfstofa hafa undirritað viljayfirlýsingu um samstarf á vettvangi útbreiðslu íþrótta- og æskulýðsstarfs og útbreiðslu golfíþróttarinnar.
Teigurinn, sem er golfhermaaðstaða til húsa að Vesturbakka 1 í Þorlákshöfn, tók til starfa fyrir um hálfum mánuði og er hugarfóstur GÞ-félaganna Hallgríms Þórs Axelssonar, sem var útnefndur sjálfboðaliði ársins 2025 hjá GÞ, og Ingvars Jónssonar, PGA-golfkennara og þjálfara hjá GÞ.
Í yfirlýsingunni segir m.a. að stefnt sé að gerð samnings sem veitir GÞ aðgang að aðstöðu Teigsins á ákveðnum tíma til að lengja og efla íþrótta- og æskulýðsstarf klúbbsins, sem GÞ hefur starfrækt á vallarsvæði sínu með hjálp Sveitarfélagsins Ölfuss.
Einnig er gert ráð fyrir að aðilarnir vinni saman að sameiginlegri markaðssetningu og útbreiðslu golfíþróttarinnar í Þorlákshöfn og nærsveitum í Ölfusi.
Kylfingar og þau sem hafa áhuga á að stíga sín fyrstu skref í golfi í 20 stiga hita og logni nú er úti kólnar, eru hvött til að kynna sér nýju inniaðstöðuna í Teignum Golfstofu að Vesturbakka 1.
Jafnframt er vert að huga að komandi vertíð hjá Golfklúbbi Þorlákshafnar, sem býður gott aðgengi að góðum 18-holu velli á verði sem er með því lægsta sem gerist á landinu.
Íslenskir landsliðskylfingar munu áfram njóta aðgangs að Þorláksvelli án endurgjalds, en Golfklúbbur Þorlákshafnar og Golfsamband Íslands hafa nú endurnýjað samkomulag þess efnis.
Nánar tiltekið er um að ræða hóp afrekskylfinga sem Ólafur Loftsson, afreksstjóri GSÍ, heldur utan um og munu kylfingarnir hafa aðgang að vellinum án endurgjalds á virkum dögum og með sérstökum afslætti helgar og rauðum dögum.
Ólafur segir þetta skipta miklu máli. “Þorláksvöllur er leikhæfur yfir stærstan hluta ársins, verður æ betri og hefur auk þess mörg einkenni sem eru sambærileg golfvöllum erlendis, sem landsliðsfólkið keppir á, þar sem hver braut afmarkast af greinilegum hindrunum í kring. Einnig eru nokkrar frábærar stuttar holur sem reyna á leikskipulag.”
“Við þurftum ekki einu sinni að hugsa okkur um, því fyrir okkur er það sjálfsagt að opna dyr okkar fyrir landsliðsfólkinu,” segir Ingvar Jónsson, þjálfari og stjórnarmaður hjá Golfklúbbi Þorlákshafnar. “Við erum íþróttahreyfing og þurfum öll að leggja hönd á plóg til að hjálpa keppnisfólki okkar að hámarka árangur sinn. Við erum stolt af þeim mikla áhuga sem við skynjum meðal landsliðsfólksins og erum farin að líta svo á að landsliðið eigi heima í Þorlákshöfn, enda erum við mjög ánægð með góða umgengni afrekskylfinganna um völlinn okkar, sem er mikilvægt því aðsókn er að aukast og stundum leikið á vellinum árstíma þegar lítil sem engin endurheimt er í grasinu.”
Aðgangurinn 2026 tekur strax gildi og fá hlutaðeigandi kylfingar skilaboð þess efnis.
Skrifað 12. febrúar 2026. Ljósmynd / GSÍ.
Félagar í Golfklúbbi Þorlákshafnar fá 20% afslátt af öllum vörum í verslun 66°Norður í Miðhrauni í Garðabæ. Þetta og margt fleira kemur fram í nýjum þriggja ára samstarfssamningi, sem undirritaður var í gær. Jafnframt verður félögum boðinn fatnaður frá 66°Norður, með merki GÞ, og verður það kynnt síðar. Einnig verða keppnislið og starfsmenn klæddir fatnaði frá fyrirtækinu.
Á myndinni er samningurinn handsalaður af þeim Hilmari Þór Kárasyni, viðskiptastjóra hjá 66°Norður, og Vigdísi Gunnarsdóttur, framkvæmdastjóra Golfklúbbs Þorlákshafnar.
Við undirritunina sagði Hilmar: “Golf nýtur fádæma vinsælda á Íslandi og 66°Norður hefur beint sjónum sínum að kylfingum í auknum mæli. Meðal annars er von á sérstakri golflínu frá okkur á næstu misserum. Samstarf okkar við Golfklúbb Þorlákshafnar fellur mjög vel að áherslum 66°Norður. Klúbburinn og völlurinn er í mikilli sókn, sem er spennandi í ljósi sérstakrar náttúru hans og langrar vertíðar. Við getum sannarlega hjálpað kylfingum að njóta vallarins óháð árstíðum,” segir Hilmar.
Vigdís segir Golfklúbb Þorlákshafnar finna sömuleiðis fyrir miklum áhuga á Þorláksvelli, sem gerður var í landgræðsluátaki á Hafnarsandi skömmu fyrir og um síðustu aldamót, til að verja þjóðveginn og hluta bæjarins fyrir sandfoki. “Baráttan við sandinn stendur enn yfir. Samningurinn við 66°Norður stuðlar að bættri þjónustu við félaga og viðskiptavini GÞ, sem er til þess fallin að auka vinsældir klúbbs og vallar og auka þannig burði GÞ til að klæða landið í hlý föt, eins og 66°Norður hefur gert fyrir Íslendinga í heila öld,” segir Vigdís.
Allir í GÞ, óháð aðildarformi, eiga kost á afslættinum, sem er aðeins fáanlegur í verslun 66°Norður í Miðhrauni í Garðabæ, gegn framvísun félagsskírteinis sem sótt er í nýju smáforriti á vegum GSÍ, sem heitir Mitt golf. Vert er að fylgjast vel með frekari fréttum af þessu spennandi samstarfi og tækifæri, sem 66°Norður eru færðar miklar þakkir fyrir.
Skrifað föstudaginn 6. febrúar 2026
Sjáðu nýjasta kynningarmyndskeið okkar, með glefsum úr undirbúningi nýrra vallarsalerna og andlitslyftingar golfskála.
Mótanefnd GÞ auglýsir eftir klúbbfélögum sem hafa áhuga á að sækja héraðsdómaranámskeið á vegum Golfsambands Íslands nú í febrúar. Þátttaka kostar ekkert og hægt er að horfa á netfyrirlestra þegar hentar. Fyrirlestrar verða 17., 19., 23. og 25. febrúar 2026, kl. 19:30 – 22:00. Taka má þátt án prófs, en héraðsdómararéttindi fást aðeins með því að standast það. Mótanefnd stefnir á að hittast og horfa saman á fyrirlestrana og verður það auglýst síðar.
Hægt er að lesa meira hér og skrá sig hjá GSÍ með því að smella á hnappinn hér að neðan eða með því að senda tölvupóst á netfangið domaranefnd@golf.is.
Þeir sem vilja láta vita af sér og fá að taka þátt í hópáhorfi mótanefndar geta sent tölvupóst til Ingvars Jónssonar, formanns mótanefndar, á netfangið ingvar@thorgolf.is.
Gjaldskrá Golfklúbbs Þorlákshafnar var staðfest á aðalfundi félagsins þriðjudagskvöldið 27. janúar sl. Félagsgjöld og árgjald aukaaðildar eru áfram með þeim lægstu sem bjóðast, sérstaklega í ljósi annarra fríðinda og óvenju langrar vertíðar Þorláksvelli.
Þetta endurspeglar áherslu GÞ á að lágmarka kostnað iðkenda, svo sem flestir fái notið þessarar vinsælu og heilnæmu útivistar og íþróttar sem Sveitarfélagið Ölfus hjálpar okkur að bjóða upp á.
Kröfur vegna félagsgjalda Golfklúbbs Þorlákshafnar fyrir árið 2026 hafa nú verið sendar út úr Abler.
Félagsmenn hafa 10 daga frest til að velja greiðsluskiptingu félagsgjalda. Að þeim fresti liðnum verður krafa send í heimabanka, hafi ekki verið brugðist við.
Ef einhverjar spurningar vakna er velkomið að hafa samband á info@thorgolf.is.
Skrifað 30. janúar 2026.
Árni Hrannar Arngrímsson var sjálfkjörinn áfram formaður Golfklúbbs Þorlákshafnar á tæplega fimmtíu manna aðalfundi félagsins, sem haldinn var í Versölum í Ráðhúsi Ölfuss í gær, þriðjudagskvöldið 27. janúar.
Varaformaðurinn Gyða Steina Þorsteinsdóttir var einnig endurkjörin, en breyting varð á stjórn þar sem Óskar Gíslason var kosinn í sæti Óttars Ingólfssonar, sem gaf ekki kost á sér áfram. Við þökkum Óttari fyrir störf hans og óskum honum velfarnaðar.
Tveir komu nýir inn í varastjórn, þeir Haraldur Guðmundsson og Snorri Jökull Egilsson. Á myndinni eru, frá vinstri, Árni Hrannar Arngrímsson formaður og Óttar Ingólfsson, fráfarandi gjaldkeri.
Skrifað 28. janúar 2026.
Hallgrímur Þór Axelsson var útnefndur sjálfboðaliði ársins á aðalfundi Golfklúbbs Þorlákshafnar sem haldinn var í gær, þriðjudagskvöldið 27. janúar.
Hallgrímur, eða Grímsi, gerði gæfumuninn í starfi mótanefndar, sem starfaði undir forystu Óskars Gíslasonar, er tvö GSÍ-mót voru haldin á Þorláksvelli á síðasta ári, VitHit Vormót GÞ á GSÍ-mótaröðinni og Íslandsmót unglinga 15-18 ára. Eru þá ótalin öll önnur mót og sjálfboðavinna sem efnt var til.
Við óskum Hallgrími innilega til hamingju með nafnbótina um leið og við þökkum öllum sjálfboðaliðum fyrir hjálpina á liðnu ári.
Skrifað 28. janúar 2026.
Ákveðið hefur verið að opna hópferð GÞ-kvenna til Spánar í haust fyrir öllum klúbbfélögum, en 13 sæti eru enn laus af 30 upphaflegum. Fyrstur kemur, fyrstur fær.
Ársskýrsla Golfklúbbs Þorlákshafnar vegna starfsársins 2025 er komin út. Skýrslan er á vefsíðuformi og er hægt að lesa hana með því að smella á hnappinn hér að neðan. Við minnum á aðalfund félagsins kl. 20 þriðjudaginn 27. janúar, í Versölum í Ráðhúsi Ölfuss.
