Félagar í GÞ fá sérkjör á Jaðarsvelli, einum glæsilegasta golfvelli landsins. Jaðar er 18-holu keppnisvöllur, fjölbreyttur, hæðóttur, skógi vaxinn og með breiðum brautum.

Klúbbhúsið er endurnýjað og stækkað íbúðarhús bæjarins Jaðars frá 1938, en golfvallargerð hófst á túnum og bithögum þar í kring upp úr 1964 þegar Akureyrarbær keypti jörðina.

Fyrri níu holurnar voru hannaðar af Magnúsi Guðmundssyni, fimmföldum Íslandsmeistara í golfi, og var völlurinn vígður 1970. Hann fékk viðurnefnið Stóri-Boli vegna lengdar sinnar og erfiðleika, en engu síður náði Björgvin Þorsteinsson, einnig margfaldur Íslandsmeistari, að leika tvo hringi á vellinum á alls 65 höggum, eða sjö undir pari. Seinni níu holurnar voru opnaðar 1980, en þær voru einnig hannaðar af Magnúsi, í félagi við Gunnar Þórðarson. Flatir voru endurgerðar og aðrar afmarkaðar skipulagsbreytingar gerðar 2004-2014 eftir hönnun frá Edwin Roald.

Á Sigló er glæsilegur 9-holu völlur í Hólsdal, innst í Siglufirði. Völlurinn, sem opnaði 2018, leiðir kylfinginn í ferðalag inn eftir mikilfenglegum fjallasal, eftir bökkum Leyningsár og Hólsár, fullum af bleikju, og þaðan inn um faldar perlur skógræktarinnar.

Völlurinn nær hápunkti á holum 5-8. Fimmta holan er stutt og breið par-4-hola sem liggur um óbreyttan túnakur frá 14. öld og fornar rústir, með óvæntum glaðningi bakvið flötina.

Því næst koma tvær af glæsilegustu par-3-holum landsins. Hin fyrri er undir hundrað metrum frá öllum teigmerkjum, með langri og mjórri flöt innan um há furutré.

Hin síðari birtist eftir göngu niður og í gegnum skóginn, áður en slegið er niður á stóra eyjuflöt í lygnu lóni sem Edwin Roald hannaði í ármótunum, til að auðvelda frágang á gamalli malarnámu sem þar var áður en völlurinn kom til.